ԵՐԵՎԱՆ, 25 հունվարի — Sputnik. Ռուսական ռուբլու տատանումները մեծ ազդեցություն չունեն Հայաստանի ֆինանսական ոլորտի վրա, Sputnik Արմենիա ռադիոկայանի եթերում ասաց տնտեսագետ Թաթուլ Մանասերյանը:
«Ռուսական ռուբլու տատանումները կապված են նավթի գների փոփոխման հետ: Իր հերթին ռուսական ռուբլու անկումը դարձավ տասնյակ կամ մի քանի տասնյակ գործոններից մեկը, որոնք ազդում են հայկական տնտեսության վրա», — ասաց Մանասերյանը:
Տնտեսագետի կարծիքով՝ դրա վառ ապացույցն այն է, որ ֆինանսական ոլորտն ու Հայաստանի ազգային արժույթը 2015 թվականին համեմատաբար կայուն մնացին, այսինքն` կախվածությունն այդքան ուժեղ չէ, որպեսզի որոշիչ լինի և ուղղակիորեն ազդի հայկական դրամի վրա:
Նրա խոսքով՝ ամբողջ աշխարհում շուկայական տատանումների հիմքում երկու արժույթներ են՝ դոլարն ու եվրոն: Հենց դրանց փոխարժեքն է ազդում մյուսների գնողունակության վրա, այդ իսկ պատճառով դոլարի թանկացման հետ են կապված մնացած գործընթացները արժութային շուկաներում։
Անդրադառնալով Ռուսաստանից Հայաստան կատարված փոխանցումներին` Մանասերյանը ուշադրություն հրավիրեց, որ ռուբլով նկատելի նվազում տեղի չի ունեցել։
«Բանն այն է, որ ընկավ հենց ռուբլու փոխարժեքը դոլարի նկատմամբ», — նշեց տնտեսագետը:
2015 թվականի նոյեմբերի վիճակագրական տվյալներով` 2014 թվականի նույն ժամանակահատվածի համեմատ Ռուսաստանից Հայաստան դրամական փոխանցումները նվազել են 28.4 տոկոսով ու կազմել մոտ 68 մլն դոլար:
Իրավիճակը հետխորհրդային տարածքի այլ երկրների հետ համեմատելով՝ նա վստահություն հայտնեց, որ դրամական փոխանցումների ծավալների նվազումը չի հանգեցնի սոցիալական ցնցումների` դրամի կայունության շնորհիվ:
«Իրավիճակը բնակչության մեջ խուճապ չի առաջացնի, ինչպես, օրինակ, հարևան Ադրբեջանում կամ հետխորհրդային այլ երկրներում: Առավել ևս, որ անկախ առաջացող դժվարություններից` շուկան չի գնում դեպի ապակայունացում», — ասաց Մանասերյանը:
Նա կոնկրետ կանխատեսումներ չարեց ռուբլու ապագա փոխարժեքի վերաբերյալ, սակայն նշեց, որ միակ ճանապարհը, որը Ռուսաստանին թույլ կտա հասնել երկարատև տնտեսական կայունության, տնտեսության դիվերսիֆիկացումն է ու նավթից կախվածության թուլացումը:
2014 թվականի ամռան սկզբից մինչև անցյալ տարեվերջ նավթի գներն ընկան երեք անգամից ավելի՝ Brent տեսակի համար 115-ից մինչև 36 դոլար մեկ բարելի դիմաց, իսկ 2016 թվականի առաջին երեք շաբաթների ընթացքում նվազեցին` դառնալով 30 դոլարից պակաս: Անցյալ շաբաթ նավթը թարմացրել է 12-ամյա նվազագույն ցուցանիշը` Brent տեսակի համար դառնալով 27 դոլար մեկ բարելի դիմաց, որից հետո վերադարձավ 33 դոլար մեկ բարելի դիմաց ցուցանիշին:
