ԵՐԵՎԱՆ, 12 հունվարի — Sputnik. Գյումրիում Ավետիսյանների ընտանիքի սպանության մեջ մեղադրվող ռուսական ռազմակայանի զինծառայող Վալերի Պերմյակովը պետք է փոխանցվի հայկական կողմին ու իր պատիժը կրի հայկական բանտում, կարծում է Փաստաբանների պալատի անդամ Նորայր Նորիկյանը։
Դաժանագույն սպանությունից մեկ տարի է անցել, և, ըստ փաստաբանի, մինչ օրս մի շարք իրավաբանական հարցեր լուծում չեն ստացել։
«Գործի քննությունն ի սկզբանե պետք է իրականացվեր հայկական իրավասու մարմինների կողմից, ու Պերմյակովը պետք է պատիժը կրեր հայկական քրեական օրենսգրքի համաձայն ու պահվեր հայկական քրեակատարողական հաստատություններում», — կարծում է Նորիկյանը։
Նրա խոսքով` այս հարցը կարգավորվում է 1995 և 1997 թվականի ռուսական կայանի մասին պայմանագրերով, որոնց համաձայն` Հայաստանի տարածքում զինծառայողների կողմից կատարած ցանկացած սպանություն պետք է քննվի հայկական օրենսդրության համաձայն։
«Եթե հանցագործությունը կատարվել է կայանի տարածքում կա՛մ ուղղված է եղել կայանի զինծառայողներից մեկի, կա՛մ նրա ընտանիքի դեմ, կա՛մ ռազմական հանցագործություն է կատարվել», — ասաց Նորիկյանը։
Ավետիսյանների նկատմամբ կատարված հանցագործությունը, նրա խոսքով, այդ բացառությունների մեջ չի մտնում։
Ի սկզբանե Պերմյակովին չպետք է հանձնեին կայանի զինծառայողներին, քանի որ յուրաքանչյուր ոք, Նորիկյանի խոսքով, սահմանն ապօրինի անցնելու փորձ կատարելիս պետք է հանձնվի հայկական իրավասու մարմիններին։
Բացի այդ, իրավաբանը ուշադրություն հրավիրեց դատավարության միջադեպին։ Նրա խոսքով` Շիրակի դատարանի` կայանի տարածքում արտագնա նիստ անցկացնելու որոշումը անօրինական է, քանի որ այդ տարածքում նա որևէ իրավասություն չունի։
«Կարելի՞ է արդյոք պատմությունից հիշել որևէ դեպք, երբ դատական նիստն անցկացվել է ուրիշ պետությանը պատկանող տարածքում, պատին փակցրել է իր պետության դրոշն ու զինանշանը ու դատական նիստ անցկացրել», —հռետորական հարց է ուղղում Նորիկյանը։
Նրա խոսքով` մինչ օրս հարցական է մնում, թե որտեղ է Պերմյակովը կրելու պատիժը։
Հիշեցնենք, որ անցյալ տարի Գյումրիում, որտեղ տեղակայված է 102-րդ ռուսական ռազմակայանը, հունվարի 12-ին դաժանաբար սպանվել էր Ավետիսյանների վեցհոգանոց ընտանիքը։ Հանցագործության կատարման կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը. Թուրքիայի տարածք անցնելու փորձի ժամանակ նրան կանգնեցրել էին ռուս սահմանապահները։
