ԵՐԵՎԱՆ, 25 դեկտեմբերի- Sputnik. Թուրքիայում լուրջ անհանգստություն է առաջացրել Ռուսաստանի Դաշնության բազայի ուժեղացումը և Հայաստանի հետ հակաօդային պաշտպանության (ՀՕՊ) միավորումը, Sputnik Արմենիա պորտալին ասաց թուրքագետ Անդրանիկ Իսպիրյանը:
«Սիրիայում Սու-24-ի կործանումից հետո Ռուսաստանն ուժեղացրել է իր ռազմակայանը Հայաստանում, բերվել են նոր մարտական ուղղաթիռներ, ՀՕՊ նոր միջոցներ, ինչն անհանգստություն է առաջացրել Թուրքիայում։ ՀՕՊ համակարգերի միավորման մասին պայմանագրի ստորագրումը Հայաստանի և Ռուսաստանի միջև մեծ արձագանք է գտել։ Գրեթե բոլոր թուրքական ԶԼՄ-ներն իրենց հրատարակությունների առաջին էջերում հաղորդել են դա` որպես գլխավոր նորություն»,- ասաց Իսպիրյանը։
Նրա խոսքով` փորձագետները և վերլուծաբանները հիմնականում գնահատել են այդ իրադարձությունը որպես Հայաստանի և Ռուսաստանի միավորում Թուրքիայի դեմ։
«Այնտեղ անհանգստացած են սեփական անվտանգության համար։ Կարծիք կա, որ Ռուսաստանը չորս կողմերից շրջափակում է Թուրքիային։ Խոսակցություններ կան, որ Ռուսաստանը բանակցություններ է վարում Կիպրոսի հետ` այնտեղ «Իսլամական պետության» դեմ պայքարի համար ռազմակայան տեղակայելու մասին»,- նշեց Իսպիրյանը։
Նա կարծում է, որ Ռուսաստանի և Կիպրոսի հարաբերությունները բավական լավ են, և նրանց միջև հնարավոր է ռազմական համագործակցություն։
ԱՊՀ պաշտպանության նախարարների խորհրդում համագործակցության երկրների ՀՕՊ ուժերի միավորումը կարևորագույն ուղղություն են համարում ԱՊՀ ՀՕՊ համակարգերի միավորման զարգացման համար։
Այժմ համակարգի կազմի մեջ մտնում է ութ պետություն` Ռուսաստանը, Հայաստանը, Բելառուսը, Ուկրաինան, Ղազախստանը, Ղրղըզստանը, Տաջիկստանը և Ուզբեկստանը։
