ԵՐԵՎԱՆ, 15 դեկտեմբերի- Sputnik. 2016թ.-ին ՌԴ-ում արտասահմանյան աշխատողների քվոտան կկազմի շուրջ 214 հազար մարդ, 2015թ.-ի համեմատ այդ ցուցանիշը նվազել է 22,4 տոկոսով, չորեքշաբթի հայտնել է Ռուսաստանի կառավարությունը։
«2016թ.-ին արտասահմանյան աշխատողների քվոտան կկազմի 213 929 մարդ, ինչը 2015թ.-ի ցուցանիշի 77,6 տոկոսն է կազմում»,- այս մասին գրված է ՌԴ կառավարության թվիթերյան միկրոբլոգում։
ՌԴ աշխատանքի նախարարությանը կից գործող միջգերատեսչական հանձնաժողովում կարծում են, որ քվոտայի ծավալները թույլ կտան բավարարել գործատուների պահանջարկը, իրագործել ներդրումային նախագծերը, ներառյալ 2017թ.-ի ֆուտբոլի Համադաշնությունների գավաթի, ինչպես նաև 2018թ.-ի ֆուտբոլի աշխարհի առաջնության անցկացման համար անհրաժեշտ նախագծումն ու շինարարությունը։
