ԵՐԵՎԱՆ, 14 դեկտեմբերի-Sputnik. Գոհար Սարգսյան. Փարիզեցի Լիլիթ Մկրտչյանի և ամուսնու` Ռենո Բրանշի տանը միայն քաղաքական հողի վրա հակասություն առաջացավ: Լիլիթը հանրապետականների, իսկ ամուսինը` սոցիալիստների կողմնակից էր: Հայ-ֆրանսիական ընտանեկան «պայքարում» հաղթեց հայկական կողմը:
«Ինչ անում ես, դրան համարժեք էլ փող ունես: Հանրապետականներն այս կարգախոսով են շարժվում, ուստի այստեղ սեփական քրտինքով աշխատող հայերի համար ավելի «ձեռնտու տարբերակ» են հանրապետականները: Իսկ հայերի հետ դիվանագիտական հարթակում համագործակցելը երկու թևերի օրակարգում է»,-պատմում է Լիլիթը:
Ո ՞ր կուսակցությունն ունի հայամետ քաղաքականություն: Լիլիթ Մկրտչյանն այս հարցում հավասարության նշան է դնում հանրապետականների ու սոցիալիստների միջև:
Ի դեպ, Ֆրանսիայում մենք մեծ համայնք ունենք, ուստի այդ երկրի ցանկացած ընտրության ելքում հայերը վճռորոշ ձայն ունեն:
Տեղեկացնենք, որ Ֆրանսիայի շրջանային ընտրության երկրորդ փուլից հետո պարզ դարձավ, որ հաղթեց Նիկոլա Սարկոզիի ղեկավարած «Հանրապետական» կուսակցությունը: Իսկ գործող նախագահ Ֆրանսուա Օլանդի ղեկավարած «Սոցիալիստական» կուսակցությունը հայտնվեց երկրորդ տեղում։
Ստացվեց` Ֆրանսիայի 7 շրջանում իշխանությունն անցավ Սարկոզիի, իսկ 5 շրջանում` Օլանդի իշխանությանը:
Իսկ ֆրանսիական «Ազգային ճակատ» կուսակցության ղեկավար Մարին Լը Պենը հպարտությամբ կանգնեց հարթակի վրա ու գոհունակությամբ հայտարարեց.
«Կեցցե՛ Ֆրանսիան: Մեզ ոչինչ չի կանգնեցնի»:
Կին քաղաքական գործիչն ընդունեց պարտությունն ու հորդորեց առաջ շարժվել:
Մարին Լը Պենի կուսակցությունը Ֆրանսիայի շրջանային ընտրության առաջին փուլում իր գործունեության պատմության մեջ լավագույն արդյունքն էր գրանցել` ստանալով քվեների 27.7 տոկոսը: Երկրորդ փուլում նրանց տհաճ անակնկալ էր սպասվում, ու կուսակցության անդամները գլխիկոր մնացին:
Մինչ ընտրությունները միջազգային մամուլը պարբերաբար քննարկում էր Մարին Լը Պենի ու «Ազգային ճակատի» որդեգրած քաղաքականությունը: Հայտնի պարբերականներից մեկն անգամ «ռասիստական» էր որակել նրա հռետորաբանությունը: Իսկ ֆրանսիական հասարակությունը կարծում է, որ Մարին Լը Պենը կարող էր ամբողջովին շրջել Եվրոպայի քաղաքականությունը: Այլ բան է, որ հասարակության մի մասը դրա տակ դրական, մյուսն էլ բացասական ենթատեքստ է դնում:
«Ադեկվատ ու դեմոկրատ ֆրանսիացիների համար վտանգավոր կլիներ նացիոնալիստների հաղթանակը: Բարեբախտաբար նրանք հաջողություն չունեցան` ոչ մի ռեգիոն չվերցրին: Նրանց հաջողության դեպքում ժողովուրդը կբաժանվեր երկու թևի: Դրանից կտուժեին Ֆրանսիայում կեցության իրավունք ունեցող օտարազգիները, այդ թվում և հայերը: Նացիոնալիստները ոչ սթափ գաղափարներ ունեն: Նրանց ծրագրերում կար օտարների մուտքի ու ելքի բացառումը, տեղական արտադրանքի մոնոպոլիզացիան»,-ասում է Ֆրանսիայում բնակվող հայազգի Լիլիթ Մկրտչյանը:
Իսկ ֆրանսիական մամուլը, ամփոփելով արդյունքները, կարծում է, որ սա եզակի ընտրություն է, որտեղ հաղթողներ ու պարտվողներ չկան: «Ազգային ճակատը» բավարար ձայներ չհավաքեց, սակայն միաժամանակ նա երբեք այսքան ուժեղ էլ չի եղել:
