ԵՐԵՎԱՆ, 14 դեկտեմբերի- Sputnik. Հայաստանում Ռուսաստանի դեսպանատունը շնորհակալագիր է հանձնել Sputnik Արմենիա պորտալին` ռուս-հայկական բարեկամության ամրապնդման և զարգացման գործում ունեցած զգալի ավանդի, ինչպես նաև` Հայաստանում Ռուսաստանի դեսպանատան, Ռոսսոտրունիչեստվոյի ներկայացուցչության և այլ ռուսական կազմակերպությունների ու ներկայացուցչությունների գործունեությունը լուսաբանելու գործում ունեցած ակտիվ մասնակցության համար։
Շնորհակալագիրը «Ռոսիա սեգոդնյա» ՄԼԳ-ի հայկական մասնաճյուղի ղեկավար Դմիտրի Պիսարենկոյին հանձնեց Հայաստանում Ռուսաստանի արտակարգ և լիազոր դեսպան Իվան Վոլինկինը։
«Պետք է երախտիքով նշել, որ անցած տարվա ընթացքում Հայաստանում Ռուսաստանի դեսպանատան, Ռոսսոտրուդնիչեստվոյի ներկայացուցչության, ռուսական կազմակերպությունների և ԶԼՄ-ների փոխազդեցությունը նոր մակարդակ է բարձրացել։ Դեսպանատունն իր կողմից փորձել է տեղեկատվական աշխատանքն ավելի բաց և թափանցիկ դարձնել. օպերատիվ և կանոնավոր կերպով կայքում տեղադրվել են դեսպանատան նյութերը, ակտիվ գործել են Facebook-ի և Twitter-ի էջերը, ուղարկվել են մամուլի հաղորդագրությունները, անցկացվել են մամուլի ասուլիսներ և կլոր սեղաններ։ Կարող եմ ասել, որ մենք այս տարի ուժեղացրել ենք մեր համագործակցության տեղեկատվական բաղադրիչը»,- ողջունելով հավաքվածներին` ասաց Հայաստանում Ռուսաստանի դեսպան Իվան Վոլինկինը։
Նա նշեց, որ իրենք բարձր են գնահատում այդ համագործակցությունը և հույս ունեն, որ չնայած տեղեկատվական պատերազմների բարդ շրջանին և ապատեղեկատվության մեծ հոսքին` հաջորդ տարի փոխգործակցությունը նոր մակարդակ կբարձրանա։
Ամփոփելով տարվա արդյունքները` Վոլինկինը նշեց, որ 2015թ.-ն իրադարձություններով հարուստ և բարդ տարի է եղել։
«Հատկապես ցանկանում եմ նշել անցած տարվա նշանակալի և հոբելյանական ամսաթվերը, որոնք միավորել են մեր ժողովուրդներին` Հայաստանի անդամակցությունը ԵՏՄ-ին, Հայոց ցեղասպանության 100-րդ տարելիցը և Հայրենական մեծ պատերազմում տարած հաղթանակի 70-ամյակը»,- ասաց Վոլինկինը։
Նրա խոսքով` ԵՏՄ-ն ծնվել է և սկսել իր առաջին քայլերը կատարել դժվարին շրջանում, բայց այդուհանդերձ կարելի է առաջընթաց տեսնել բոլոր ուղղություններում։
«Չնայած պատժամիջոցներին` միության երկրների միջև առկա ապրանքաշրջանառությունն աճում է, տարբեր ոլորտներում օրենսդրության ներդաշնակեցման ակտիվ գործընթաց է ընթանում, ավելանում է խորհրդարանական պատվիրակությունների, մասնագետների և փորձագետների հոսքը Հայաստան, բարձրացել է զբոսաշրջիկների կողմից Հայաստանի նկատմամբ հետաքրքրության մակարդակը»,- նշեց Վոլինկինը։
Նա ասաց, որ այս տարվա ընթացքում երկրներն ակտիվ և ինտենսիվ երկխոսություն են անցկացրել ԵՏՄ շրջանակում, և մեծ դեր են խաղացել բարձր մակարդակի կապերը։
«Կանոնավոր բնույթ են կրել նաև կառավարությունների ղեկավարների, նախարարությունների և գերատեսչությունների ղեկավարների հանդիպումները։ Համակարգված զարգացել է խորհրդարանների համագործակցությունը, միջմարզային ակտիվ կապեր են հաստատվել Ռուսաստանի Դաշնության շուրջ 70 սուբյեկտի և Հայաստանի բոլոր մարզերի միջև։ Վերջին օրինակներից նշեմ, որ ՌԴ կառավարության և ՀՀ կառավարության միջև ԵՏՄ անդամակցության շրջանակում տեխնիկական և ֆինանսական աջակցություն ցուցաբերելու համաձայնագրի համաձայն, օրեր առաջ Երևանում տեղի է ունեցել Հայաստանի մաքսային ծառայությանը 130 մլն ռուբլի արժողությամբ 114 միավոր ավտոմոբիլային տեխնիկայի հանդիսավոր հանձնման արարողությունը»,- նշեց դեսպանը։
Նա հույս հայտնեց, որ հաջորդ տարի Հայաստանի նախագահությունը ԵՏՄ-ում նոր խթան կհաղորդի փոխգործակցության խորացմանը։
