Երկրագնդի վրա տիեզերական աղբ է թափվելու

ԵՐԵՎԱՆ, 27 հոկտեմբերի – Sputnik. Նոյեմբերի 13-ին Շրի Լանկա կղզու շրջանում տիեզերական աղբի մի խոշոր կտոր կընկնի, հայտնում է Եվրոպական տիեզերական գործակալությունը։

Տիեզերական տարածքին հետևող մասնագետներն այս տարվա հոկտեմբերին անսովոր բացահայտում են արել։ Նրանք տեսել են, որ արտասովոր մի օբյեկտ սրընթաց մոտենում է Երկրագնդին և աստերոիդների հայտնի որևէ խմբի չի պատկանում։

Եվրոպական տիեզերական գործակալության ծառայության ներկայացուցիչ Գերհարդ Դրոլսհագենը (Gerhard Drolshagen), շարունակելով հետազոտությունն ու ուսումնասիրելով վերջին մի քանի տարվա արխիվային լուսանկարները, հայտնաբերել է, որ դա կորած WT1190F օբյեկտն է, որը պտտվում է ձգված ուղեծրով։

Նոր դիտարկումներն ու հին լուսանկարները օգնել են գիտնականներին անել այն, ինչը շատ հազվադեպ է հաջողվում աստղագետներին` կանխագուշակել` որտեղ և երբ կընկնի տիեզերական աղբի այդ կտորը։ Հաշվարկների համաձայն, օբյեկտը կընկնի 2015 թվականի նոյեմբերի 13-ին, Երևանի ժամանակով 10։20–ին։ WT1190F–ը կվերադառնա Երկիր և կընկնի Շրի Լանկայի ափերից 100 կմ–ի հեռավորության վրա։

Ինչպես կարծում է Դրոլսհագենը, 1-2 մետրանոց այս «երկնային մարմինն» ամբողջովին կայրվի մթնոլորտում, սակայն չի բացառվում, որ ինչ–որ մասը կարող է հասնել Հնդկական օվկիանոս։ Գիտնականը խորհուրդ է տալիս այդ գոտում ձկնորսությամբ չզբաղվել և չփորձել լուսանկարել, որովհետև դա կարող է վտանգավոր լինել կյանքի համար։