ԵՐԵՎԱՆ, 23 հոկտեմբերի – Sputnik. Հայաստանում 558.401 քաղաքացի այսօր չի կարող ընտրել, քանի որ ունի միայն նույնականացման քարտ, իսկ Ընտրական օրենսգիրքն արգելում է ընտրելու իրավունքը, եթե նշում չի արվում անձնագրում:
ԱԺ Պետաիրավական հարցերի մշտական հանձնաժողովի նիստում այսօր քննարկվել է «ՀՀ Ընտրական օրենսգրքում» և «Նույնականացման քարտերի մասին» ՀՀ օրենքում փոփոխություններ կատարելու երկու նախագիծ: Հեղինակներն են ՀՀԿ-ն և պատգամավոր Տիգրան Ուրիխանյանը:
Եթե ՀՀԿ-ի օրինագծի նպատակն է, որ քաղաքացին կարողանա ընտրել նաև նույնականացման քարտով, ապա Ուրիխանյանն առաջարկում է նույնականացման քարտով ընտրության իրավունքից բացի, պարտադիր որևէ տարբերակով վերահսկողություն սահմանել: Այսինքն` ֆիքսել ընտրություն կատարելու փաստը, օրինակ` կիրառելով որևէ էլեկտրոնային սարք:
Պատգամավորները համաձայնելով`միաժամանակ նշել են, որ էլեկտրոնային սարքը բավարար չէ անհրաժեշտ վերահսկողություն իրականացնելու համար: Առաջարկվել է Ոստիկանությանը նույնականացման քարտով ընտրող քաղաքացիների ցուցակը տեղեկանքի ձևով ներկայացնել ընտրական հանձնաժողովի նախագահներին:
Հանձնաժողովի նախագահ Հովհաննես Սահակյանը, առաջարկին դեմ չլինելով, նկատել է, որ վերահսկողություն իրականացնելու դեպքում բավականին ժամանակ է պետք, որպեսզի կառավարությունը գումար հատկացնի սարքերը գնելու և ավելի քան 18 հազար ընտրական հանձնաժողովների նախագահների ուսուցում կազմակերպելու համար:
«Եթե նույնիսկ ամենալավատեսական հայացքով նայենք, չենք հասցնի մինչև հանրաքվե, երբ 500-550 հազար քաղաքացու ընտրություն կատարելու խնդիր է առաջ քաշվելու» — ասել է Հովհաննես Սահակյանը:
Քննարկումներից հետո դրական եզրակացություն ստացավ ՀՀԿ–ականների ներկայացրած նախագիծը, ըստ որի` նույնականացման քարտ ունեցող քաղաքացիները կարող են մասնակցել ընտրություններին:
Օրինագիծը մտել է ԱԺ մեծ օրակարգ, հարցը կքննարկվի երկուշաբթի մեկնարկող ԱԺ քառօրյա նիստերի ընթացքում` 24-ժամյա ռեժիմով:
«Նույնականացման քարտի մասին» օրենքում փոփոխությունն արագացված ռեժիմով քննարկելու փաստը պայմանավորված է դեկտեմբերի 6-ին կայանալիք Սահմանադրական փոփոխությունների հանրաքվեով:
