Գագիկ Հարությունյան. ՀԱՊԿ-ն անում է այն, ինչ պետք է աներ տվյալ իրավիճակում

ԵՐԵՎԱՆ, 27 սեպտեմբերի– Sputnik.  ՀԱՊԿ-ի օգնությունը Հայաստանին շատ մեծ է. այն փաստը, որ Հայաստանն այդ դաշինքի անդամ է, արդեն շատ բան է նշանակում, «Sputnik-Արմենիա» ռադիոկայանի հետ զրույցում նման տեսակետ հայտնեց «Նորավանք» գիտակրթական հիմնադրամի տնօրեն Գագիկ Հարությունյանը՝ մեկնաբանելով վերջին օրերին սահմանային լարվածության ֆոնին ՀԱՊԿ-ի կողմից օգնության ակնկալիքի մասին հարցը:

«Ասել, որ Հայաստանը ՀԱՊԿ-ից օգնություն չի ստանում, մի փոքր ոչ կոռեկտ է, որովհետև լինելով ՀԱՊԿ-ի անդամ` մենք մեծագույն առավելություն ունեք մեր հարևանների նկատմամբ, որոնք որևէ ռազմական դաշինքի մեջ ներգրավված չեն: Դաշնային պայմանավորվածությունները և պայմանագրերը ՀԱՊԿ-ի հետ, թույլ են տալիս մեզ սպառազինվել այն չափով, որքանով անհրաժեշտ է: Վերջինը՝ համապատասխան հրթիռները ստանալու փաստն է: Այնպես որ, եթե մենք չլինեինք ՀԱՊԿ-ի անդամ, հայտնի չէ, թե ինչ զարգացումներ կլինեին մեր տարածաշրջանում, մասնավորապես՝ Հայաստան-Ադրբեջան-Արցախ եռանկյունում»,-ընդգծել է Հարությունյանը:

Գիտակրթական հիմնադրամի տնօրենը նշում է, որ հայ-ադրբեջանական  սահմանին խնդիրները շարունակվում են ավելի քան տասներկու տարի՝ հրադադարի համաձայնագրի ստորագրումից որոշ ժամանակ անց, և ամեն անգամ, երբ սահմանին լարվածություն է լինում՝ բարձրանում է ՀԱՊԿ-ի միջամտության հարցը:

«Ամեն անգամ ՀԱՊԿ-ի հետ կապված ինչ-որ ձևով առաջանում են այդ խնդիրները. եթե ինչ-որ հրաձգություն կա, ապա ՀԱՊԿ-ն պետք է անմիջապես միջամտի, սակայն դա այդպես չէ: ՀԱՊԿ-ն իր խոսքը կասի, երբ լուրջ պատերազմական իրավիճակ ստեղծվի: Ակնկալել ավելին, քան ՀԱՊԿ-ն անում է, փոքր-ինչ քաղաքական  պարզամտություն է: Եվ, ընդհանրապես, ՀԱՊԿ-ի խնդիրը պետք է մի փոքր ավելի ռազմավարական տեսանկյունից նայել»,-նկատել է բանախոսը:

Ըստ Հարությունյանի՝ այդ կազմակերպության մեջ լինելը մեծագույն երաշխիք է Հայաստանի անվտանգության համար, մանավանդ այն իրավիճակում, երբ ռիսկերը ոչ միայն Ադրբեջանից են գալիս, այլև Մերձավոր Արևելքից: «Բայց և այնպես, ՀԱՊԿ-ն անում է այն, ինչ պետք է աներ և, անհրաժեշտ պարագայում, կանի այն, ինչ- որ պարտավոր է անել»,-համոզված է «Նորավանք» գիտակրթական հիմնադրամի տնօրենը: