«Կոմիտաս» փառատոն. լավագույն կոլեկտիվները անմահ երաժշտություն կկատարեն

ԵՐԵՎԱՆ, 25 սեպտեմբերի – Sputnik. «Կոմիտաս» փառատոնը նվիրված է ականավոր հայ կոմպոզիտոր, երաժշտագետ, երգիչ և երգչախմբի դիրիժոր Կոմիտասի արվեստին և անցկացվելու է Երևանում սեպտեմբերի 26-ից հոկտեմբերի 8-ը։

Փառատոնի ընթացքում ելույթ կունենան Հայաստանի պետական ազգային ակադեմիական երգչախումբը, «Հովեր» կամերային երգչախումբը, մեներգիչներ Իրինա Զաքյանը (սոպրանո), Սարգիս Բաժբեուկ–Մելիքյանը (բարիտոն), Սվետլանա Նավասարդյանը (դաշնամուր), Հայկ Մելիքյանը (դաշնամուր), Արմեն Աղաջանյանը (դաշնամուր), ինչպես նաև «Երգող Հայաստան» հանրապետական մանկապատանեկան մրցույթի դափնեկիր երգչախմբերը։

«Կոմիտաս» փառատոնի հանդիսավոր բացումը տեղի կունենա սեպտեմբերի 26-ին Երևանի Սպենդիարյանի անվան օպերայի և բալետի թատրոնում

Փառատոնն անցկացվում է Կոմիտասի թանգարան–ինստիտուտի նախաձեռնությամբ և Հայաստանի մշակույթի նախարարության աջակցությամբ։

Ականավոր կոմպոզիտոր Կոմիտասի (իսկական անունը` Սողոմոն Սողոմանյան – 1869-1935) արվեստը հայտնի է ողջ աշխարհում

Կոմիտասը երաժշտություն է դասավանդել Էջմիածնի հոգևոր ճեմարանում, զուգահեռ երգչախումբ է ձևավորել, երաժշտական գործիքների նվագախումբ, զբաղվել է ժողովրդական երգերի մշակմամբ, առաջին ուսումնասիրություններն է գրել հայկական եկեղեցական երաժշտության վերաբերյալ։ Աշխարհի տարբեր երկրներում Կոմիտասը ելույթ է ունեցել որպես կատարող և հայկական երաժշտության քարոզիչ։

Ականատես լինելով 1915 թվականի Օսմանյան կայսրությունում հայերի դաժանաբար ոչնչացմանը` Կոմիտասը խելագարվել է։ Հրաշքով հաջողվել է նրան փրկել և գաղտնի տեղափոխել Եվրոպա։

Կոմիտասը երկար` 20 տարի անցկացրել է Փարիզի հոգեբուժարանում, որտեղ և մահացել է 1935 թվականին` այդպես էլ ուշքի չգալով տեսածից։ Այդ ժամանակվանից Կոմիտասի կերպարն անբաժան է հայ ժողովրդի ազգային վշտից և ցավից։

Կոմիտասի անունով է կոչվում լարային քառյակը, Երևանի պետական կոնսերվատորիան, Կամերային երաժշտության տունը, պողոտա, զբոսայգի, Ստեփանակերտի երաժշտական դպրոցը։