Երևանը սպասում է Մոսկվայի Փարաջանովի անվան թատրոնի հյուրախաղերին

ԵՐԵՎԱՆ, 9 սեպտեմբերի —  Sputnik. Մոսկվայի Սերգեյ Փարաջանովի անվան թատրոնի հյուրախաղերը կանցկացվեն սեպտեմբերի 22–ին և 23–ին, Sputnik Արմենիա պորտալին հայտնել են Ստանիսլավսկու անվան պետական ռուսական դրամատիկական թատրոնից։

Երևանյան հանդիսատեսի դատին կներկայացվի երկու ներկայացում` «Արմենիադա» և «Կյանքը բիս չես խաղա»

«Արմենիադա» բեմադրությունը կինոթատերական տարածքի սինթեզ է, որը թույլ է տալիս հանդիսատեսին ֆանտաստիկ ուխտագնացություն կատարել դեպի նախնիների երկիր։

Բեմադրության սյուժետային հիմքը պատմում է երկու գլխավոր կերպարների` Ժամանակի և Ջանի երևակայական հանդիպման մասին։ Պոետիկ հզոր խոսքի, դյութիչ տեսաշարի, վիրտուոզ կենդանի երաժշտության, սրտառուչ վոկալի և շիկացած դրամատիզմի շնորհիվ «Արմենիադա» բեմադրությունը հրավիրում է հանդիսատեսին հայացք նետել վերածնման հավիտենության մեջ` անցնելով Մեծ Հայքի ծանոթ և անծանոթ աշխարհներով, յուրաքանչյուրի հոգում արթնացնելով սեփական գենետիկ կոդի զգայական հիշողությունը։
 
«Կյանքը բիս չես խաղա» բեմադրությունը երաժշտական–պոետիկ զվարճալի ներկայացում է` պոեզիայի, երաժշտության կախարդական աշխարհ… Կհնչեն Վլադիմիր Վիսոցկու, Բուլատ Օկուջավայի, Ռոբերտ Ռոժդեստվենսկու, Մարինա Ցվետաևայի, Իոսիֆ Բրոդսկու, Եվգենի Եվտուշենկոյի, Բելա Ախմադուլինայի ստեղծագործությունները։

Մոսկվայի Սերգեյ Փարաջանովի անվան թատրոնը ստեղծվել է 1994 թվականին։ Դա աշխարհում միակ լաբորատորիան է, որը փորձեր է կատարում 20–րդ դարի Մեծ վարպետ Սերգեյ Փարաջանովի բացառիկ կերպարների և առասպելների ոլորտում, գեղեցիկ այլաբանությունների, կախարդական վերափոխումների և բախված տարերքների թատրոն։ 

Հյուրախաղերը կանցկացվեն Հայաստանի մշակույթի նախարարության և Գիտության ու մշակույթի ռուսական կենտրոնի տեղեկատվական օժանդակությամբ և նվիրված են Հայոց ցեղասպանության 100–րդ տարելիցին

Նախագծի հեղինակը և բեմադրող ռեժիսորը Վլադիմիր Գաբեն է։ Երաժշտական ղեկավարը և կոմպոզիտորը` Մադաթ Ավանեսովը։