Հիմալայան արջեր` շների փոխարեն. Խաբարովսկի հայազգի բնակիչը անսովոր կենդանիներ է պահում

Հիմալայան արջերով մասնավոր բուծարան է պահում Խաբարովսկի բնակիչ Գարիկ Կիրակոսյանը։ Մաշա և Միշա զույգը ապրում են տան մոտ գտնվող վանդակում։ Այսպիսի «հարևանների» առկայությունը մտահոգում է տեղի բնակիչներին։  Ինչպես պնդում են արջի տերն ու նրա բարեկամները, կենդանիները ոչ մի վտանգ չեն ներկայացնում տեղի բնակչության համար, քանի որ հիմալայան արջերը բուսակեր են և երբեք մարդկանց վրա չեն հարձակվում։
 
«Նրանք բնակվում են այստեղ 2002 թվականից։ Մարդիկ գալիս տեսնում, ուրախանում են։ Ոչինչ, ոչ մեկի չեն խանգարում։ Որոշ մարդիկ, ճիշտ է, վախենում են», – պատմել է Գարիկ Կիրակոսյանի զարմիկ Արտյոմը։
 
Ինչպես հայտնում է Ruptly–ն, տեղի բնակիչներն արդեն դիմել են իշխանություններին` արջերին մարդկանցից հեռու տանելու խնդրանքով։

Հիմալայան արջը կաթնասուն գիշատիչ կենդանի է: Արուների մարմի երկարությունը 170 սմ է, զանգվածը՝ 140-150 կգ: Հիմալայան արջերն ապրում են լեռնային անտառներում։ Նրանք տարածված են Իրանի և Աֆղանստանի հյուսիսային հատվածներում, Պակիստանում, Ճապոնիայում, Կորեայում, Ամուրի շրջանում։ Ամենամեծ արեալը զբաղեցնում է Չինաստանինը։ Սպիտակակուրծք արջեր կան նաև Վիետնամում, ինչպես նաև Թայվան և Հոնգկոնգկղզիներում։

Սնվում են հիմնականում տարբեր հատապտուղներով, բուսակեր են և մարդկանց վրա չեն հարձակվում։
 
Հիմալայան արջերը գրանցված են Բնության պահպանության միջազգային միության (ԲՊՄՄ) Կարմիր գրքում` որպես վերացող կենդանի և ներառված են վայրի ֆաունա և ֆլորայի միջազգային առևտրի մասին I Կոնվենցիայի հավելվածում։ 2011 թվականին վերացող արջերի մասնագետների Համառուսաստանյան VIII գիտաժողովի բանաձևում նշված էր հիմալայան արջերին ՌԴ Կարմիր գրքի մեջ ներառելու անհրաժեշտությունը` որպես քիչ քանակի և արագ կրճատվող արեալով տեսակ։