ԵՐԵՎԱՆ, 18 օգոստոսի – Sputnik. ՌԴ նախագահ Վլադիմիր Պուտինը մասնակցել է Ռուսական աշխարհագրական միության (ՌԱՄ) 170–ամյակին նվիրված հանդիսությանը։ Նա Ղրիմի ափերի մոտ բատիսկաֆով իջել է Սև ծովի հատակը։
Այսօր Ռուսաստանի ամենահին հասարակական կազմակերպությունը տոնում է իր 170–ամյակը։ Այս տարիների ընթացքում Ռուսական աշխարհագրական միությունն ուսումնասիրել է Ռուսաստանի տարածքը։ ՌԱՄ–ի հոգաբարձուներն են եղել չորս կայսրեր, իսկ հիմա հոգաբարձուն նախագահ Պուտինն է։
ՌԴ նախագահը մասնակցել է տոնական արարողությանն ու այդ խորհրդանշական օրը սուզանավով իջել է Սև ծովի հատակը։ Նա Բալակլավայի բնակավայրում բատիսկաֆով իջել է Սև ծովի հատակը` խորտակված հին նավի մոտ, որը գտնվում է 83 մետր խորության տակ։
Սուզվելուց հետո Պուտինը շփվել է լրագրողների հետ և շնորհավորել բոլորին ՌԱՄ–ի հիմնադրման 170–ամյակի կապակցությամբ։
«Այնպես ստացվեց, որ հենց այսօր մենք հայտնվեցինք Ղրիմում և ուսումնասիրեցինք հազվագյուտ մի օբյեկտ, որը մասնագետների կողմից թվագրվում է X-XI դարով։ Դա մեծ առագաստանավ է, որը տեղափոխել է քաղաքացիական բեռներ և խորտակվել Բալակլավայի ծովախորշի մոտ։ Շատ հետաքրքիր օբյեկտ է։ Սակայն մասնագետները դեռ պետք է ուսումնասիրեն այն։ Պետք է նշեմ, որ Սև ծովի հյուսիսային մասում նման օբյեկտներն այդքան էլ շատ չեն», – նշել է ՌԴ նախագահ Վլադիմիր Պուտինը։
Պուտինը բազմիցս մասնակցել է ՌԱԳ–ի գիտարշավներին։ 2009թ.–ին նա «Միր» սուզանավով իջել էր Բայկալի հատակը։ 2011թ.–ին հին հունական Ֆանագորիա քաղաքի պեղումներին մասնակցելիս Պուտինը սուզվել էր Թամանի ծոցում և հատակից հանել երկու կոտրված սափոր։ Իսկ 2013թ.–ին Explorer 5 ստորջրյա սարքավորումով Ֆիննական ծոցում հետազոտել էր այն վայրը, որտեղ գտել էին 1869թ.–ին խորտակված ֆրեգատը։
