ԵՐԵՎԱՆ, 15 օգոստոսի- Sputnik. Աշխարհի շատ երկրներում տարածում է գտել մի նոր ու անսովոր զվարճանք՝ The Color Run (գունավոր վազք) մարաթոնը: Վազքի մասնակիցները հաղթահարում են մի քանի կիլոմետր տարածություն և վերջնագծին մոտենում են ոտքից գլուխ «գունազարդված»:
Մարաթոնն անցկացվում է Ռուսաստանում, Բրազիլիայում, Չինաստանում, ԱՄՆ-ում, Ավստրալիայում և այլ երկրներում, և բոլորովին կարևոր չէ մասնակցի մարզական պատրաստվածության աստիճանը կամ տարիքը: Գլխավորը լավ տրամադրությունն է: Այս տարի գունավոր վազքին միացել էր նաև Երևանը:
Շաբաթ օրը վաղ առավոտյան Կ. Դեմրիճյանի անվան մարզահամերգային համալիրի մոտ հավաքվել էր ավելի քան 200 մարդ, նրանց թվում նաև երեխաներ կային: Մասնակիցները պետք է հաղթահարեին իրենց կյանքի ամենաուրախ և երջանիկ երեք կիլոմետրերը:
Բոլորի տրամադրությունը տոնական էր: Երեքկիլոմետրանոց վազքը մեկնարկեց կարճ նախավարժանքից հետո: Ողջ ընթացքում վազորդների վրա ցայտում էին բազմագույն ներկերը, և վերջնագծին հասնելուց հետո նրանք փայլում էին ծիածանի բոլոր գույներով:
Վազքն ավելի շատ զվարճալի էր, քան մրցութային. մասնակիցների արդյունքները չէին գրանցվում մարզական կանոնների ողջ խստությամբ: Սակայն վերջնագծին առաջինը մոտեցած երեք տղաներն ու աղջիկները խորհրդանշական մրցանակներ ստացան կազմակերպիչներից:
Մարաթոնի ավարտը նշանավորվեց գույների հրավառությամբ, իսկ ցանկացողները սկսեցին պարել: Երևանյան The Color Run-ը, ամեն ինչից զատ, ուներ բարեգործական նպատակ: Մարաթոնի շրջանակում հավաքված միջոցները, մասնակցության վարձը (3000 դրամ) կտրամադրվեն 9-ամյա Գոռի բուժմանը: Փոքրիկը վերականգնողական խնամքի կարիք ունի կոնքազդրային հոդի վիրահատությունից հետո:
Կարելի է վստահաբար ասել, որ վազքի բոլոր մասնակիցները՝ անկախ տարիքից և մարզավիճակից, անասելի բավականություն և դրական լիցքեր ստացան՝ դառնալով The Color Run համաշխարհային շարժման մի մասնիկը:
