ԵԱՀԿ ԽՎ–ի ավելի քան 50 պատվիրակներ դատապարտել են ամառային նստաշրջանից ՌԴ–ի բացառումը

ԵՐԵՎԱՆ, 9 հուլիսի– Sputnik. ԵԱՀԿ Խորհրդարանական վեհաժողովի իտալական պատվիրակությունը հինգշաբթի նամակ է ուղղել ԽՎ–ի նախագահ Իլկա Կաներվային, որը ստորագրել են 55 խորհրդարանականներ։ Նամակում դատապարտվում է ԵԱՀԿ ԽՎ ամառային նստաշրջանի մասնակիցների ցանկից Ռուսաստանի բացառումը, Sputnik–ին հայտարարել է «Հյուսիսի լիգա» կուսակցության իտալացի պատգամավոր Կլաուդիո Դ`Ամիկոն  (Claudio D`Amico)։

Ավելի վաղ Ֆինլանդիան հրաժարվել էր թույլատրել պատժամիջոցների տակ գտնվող ռուս խորհրդարանականների մուտքը երկիր` հուլիսի 5–9–ը ԵԱՀԿ ԽՎ ամառային նստաշրջանին մասնակցելու նպատակով։ Խորհրդարանականների թվում էր նաև Սերգեյ Նարիշկինը։ Դրան ի պատասխան` ռուսական պատվիրակությունը որոշեց չգնալ Հելսինկի ամբողջական կազմով։ ՌԴ արտգործնախարարությունը Հելսինկիի որոշումը անբարյացակամ քայլ որակեց։

ԵԱՀԿ ԽՎ նախագահ Իլկա Կաներվային հասցեագրված նամակում պատվիրակները «ափսոսանք են հայտնել այն փաստի կապակցությամբ, որ ռուսական պատվիրակության մասնակցությունը ամառային վեհաժողովին անհնար է»։ Նամակում նաև նշվում է, որ Հելսինկիի ոգուն հակասում է կարևոր երկխոսությանը ՌԴ ընտրված խորհրդարականներին թույլ չտալու փաստը։

ԵԱՀԿ Խորհրդարանական վեհաժողովը, որի հերթական նստաշրջանն անցկացվեց չորեքշաբթի Հելսինկիում, ընդունել է բանաձև, որը դատապարտում է Ուկրաինայի տարածքում և երկրի սահմանների մոտ Ռուսաստանի իրականացրած գործողությունները  երկրում շարունակվող ճգնաժամի համատեքստում։

Բանաձևի ընդունմանը կողմ է քվեարկել ամենամյա նստաշրջանի 96 անդամ, յոթ մարդ դեմ էր, ևս 32–ը` ձեռնպահ։ Բանաձևի տեքստը պատրաստել էին Ուկրաինայի և Կանադայի պատվիրակությունների անդամները։ Փաստաթղթի տեքստում նշվում է, որ վեհաժողովը դատապարտում է «Ռուսաստանի միակողմանի և չարդարացված հանցափորձը Ուկրաինայի ինքնավարության և տարածքային ամբողջականության նկատմամբ»։

Ավելի վաղ տեղեկացվում էր, որ ռուսական պատվիրակությունը չի մասնակցել քվեարկությանը, քանի որ «հրաժարվել է մասնակցել 2015 թ.–ի նստաշրջանին»։